لە کۆتاییدا نەتەوەی کورد لە باشوری کوردستان، یان جوانتر بڵێین پارتی و یەکێتیی گەیشتنە ئەو بڕوایەی کە دەبێت نەتەوەی کورد خاوەنی لەشکرێکی نیشتمانی و نەتەوەیی بێت، چونکە بوونی ئەو لەشکرە زامنی سەرکەوتن و بەدیهێنانی خەونە لە مێژینەکانی گەلەکەمانە نەوەکوو تەنیا لە باشوری کوردستان، بەڵکوو لە سەرجەم پارچە داگیرکراوەکانی نیشتمان جێگەی دڵخۆشی هەموو کوردێکی بەشەرەف و خاوەن ویژدان و خاکپەرستە، بۆیە یەکگرتنی هێزی پێشمەرگە لەژێر هەر ناوێک دابێت، لەژێر چەتری وەزارەتی پێشمەرگەدا لە چوارچێوەی حکوومەتی هەرێمدا دڵی تاک بە تاکی گەلەکەمانی خۆشکرد و موژدەیەکیش بوو بۆ سەرجەم دۆستانمان، کە لە هەوڵی ئەو یەکخستنە درێخیان نەکرد، بە تایبەتی هێزی هاوپەیمانان.
بەو هەنگاوە بوێرانەیە یەکێتیی و پارتی، ئەگەر وەکوو خۆی جێبەجێ بکرێت، کورد دەبێتە خاوەنی لەشکرێکی نیشتمانی و نەتەوەیی، هێزی پێشمەرگەی کوردستان لە جێگەی ئەوەی لە ململانێی حیزبیدا ڕۆڵ بگێڕێت، دەبێتە هێزێکی نیشتمانی و بنەما بۆ برایەتی و هەنگاونان بۆ سەرکەوتنی یەکجارەکی، چونکە ئەگەر بەر لە یەکگرتنیان، هەر هێزە و فەرمانی لە حیزبەکەی وەردەگرت و بەکار دەهێنرا، ئێستا دوای ئەو بڕیارە کوردانەیە حیزب ناتوانێت هێزی پێشمەرگە بەکار بهێنێت. لە گەڵ ئەوەشدا، ئەو هێزە دەبێتە جێگەی متمانە و ناو و ناوبانگی نێودەوڵەتی هەڵدەگرێت و دۆست و دوژمن حیسابی تایبەتی بۆ دەکات، کوردیش لەو نێوەندەدا دەبێتە خاوەنی سوپایەکی یەکگرتوو بە دسپلین و بڕاوەی دەستی حیزب، هەرچەندە حیزب دروستکەری ئەو هێزانەن پێیانەوە ماندووبوونە، بەڵام حیزبەکانیش لە پارتی و یەکێتیی درکیان بەوە کردوە، کە دەبێت لەبەر ئەوەی حکوومەت و پەرلەمان و وەزارەتێکمان بەناوی وەزارەتی پێشمەرگە هەیە، بۆیە دەبێت هێزی پێشمەرگە لە چوارچێوەی ئەو وەزارەتەدا ڕێک بخرێت و درێژە بە کار و چالاکی خۆیان بدەن، بۆیە لە مەراسیمێکی شایستەدا بە ئامادەبونی سیاسییە باڵاکانی حیزبە سیاسییەکان و حکوومەتی هەرێم و دۆستانمان ئەو هەنگاوە ئازایانەیە دراو ئیدیکە کورد و حکوومەتی هەرێم لە باشوری کوردستان خاوەنی لەشکرێکی نیشتمانی خۆیەتی، ئەو لەشکرە ئەرکی نەتەوەیی و نیشتمانی دەکەوێتە ئەستۆ و لە ڕەهەندە نەتەوییەکاندا بەشدار دەبێت، بەجۆرێک هێزی پێشمەرگە بۆ لەمەودوا مافی حیزبەکانی بەسەرەوە نامینێت و لە ململانێ حیزبییەکاندا بە کار ناهێنرێت.
