ناسیونالیزمی کوردی بریتییە لەو بزووتنەوە سیاسی , کۆمەڵایەتی و کولتوورییەی کە پێی وایە، کورد نەتەوەیەکی سەربەخۆیە و مافی ئەوەی هەیە چارەنووسی خۆی دیاری بکات، جا چ لە ڕێگەی دامەزراندنی دەوڵەتێکی سەربەخۆوە بێت، واتە کوردستانی گەورە، یان بەدەستهێنانی ئۆتۆنۆمی و مافە نەتەوەییەکان لە چوارچێوەی ئەو دەوڵەتانەی کە کوردستانیان بەسەردا دابەشکراوە (تورکیا و ئێران و عێراق و سووریا).
لە مێژووی ڕۆژهەڵاتی ناوەڕاستدا، پرسی نەتەوەبوونی کورد و مافی سەربەخۆیی هەمیشە لەنێوان ویستی قووڵی نەتەوەیی و هاوکێشە سەختەکانی سیاسەتدا جێگیر بووە. بۆ نەتەوەیەک، کە خاوەنی زمان و یادەوەریی هاوبەش و کولتووری نەتەوەیی و خاکێکی یەکپارچەی جوگرافییە، گەڕان بەدوای ناسنامەی نەتەوەیی و مافی بڕیاردان لە چارەنووسدا، دیاردەیەکی سروشتییە و لە ئەزموونی گەلانی خاوەن دەوڵەت و نەتەوەکانی جیهاندا بینراوە. لەگەڵ ئەوەشدا، ئەم پرسە لە ژینگەیەکی هەرێمیدا هاتووەتە ئاراوە، کە هاوسەنگیی هێز و بەرژەوەندیی دەوڵەتە دراوسێ و نێودەوڵەتییەکان زۆرجار سنوور و بەربەستی گەورەیان لەبەردەمیدا دروست کردووە.
لە ڕوانگەیەکی فەلسەفییەوە، ناسیونالیزم تەنیا پۆلێنکردنێکی دیمۆگرافی یان زمانی نییە، بەڵکوو گەڕانە بەدوای دانپێدانان و خاوەندارێتیی بوون و چارەنووس، وەکوو ڕەنگدانەوەی ئەوەی کە نەتەوەیەک بیەوێت خاوەنی ئیرادەی سەربەخۆی خۆی بێت نەوەکوو تەنیا بەشێک بێت لە پێناسە و سنووری ئەوانی دیکە. لە قۆناغەکانی پێشوودا، گیانی نەتەوەیی کورد زۆرجار وەکوو قەڵغانێک بەرانبەر نکۆڵیکردن لە ناسنامە ڕۆڵی گرنگی هەبووە لە پاراستنی هەستی هاوبەش و ڕێگریکردن لە تواندنەوە. بەڵام لە سەردەمی ئەمڕۆدا، مانەوە تەنیا لە چوارچێوەی سۆز و یادەوەریی تاڵ و دروشمە گشتییەکاندا چیدیکە وەڵامدەرەوەی پێداویستییەکانی قۆناغەکە نییە، چونکە ڕوحی نەتەوەیی ئەگەر لە یادەوەریی برین و قوربانیبووندا قەتیس بمێنێت، ناتوانێت بە شێوەیەکی کردەیی ڕێگەی بەرەوپێشەوە بکاتەوە. گیانی نەتەوەیی کاتێک بەهێز و کاریگەر دەبێت، کە وەکوو ڕوانینێکی ڕوون و عەقڵانی و بەردەوام خۆی ڕێک بخات و بتوانێت بەرژەوەندیی باڵای نەتەوە بپارێزێت، نەوەکوو تەنا لە کاتی هەڵکشانی سۆزدا بجووڵێت.
مافی سەربەخۆیی، وەکوو پرەنسیپێکی بنەڕەتی و مافێکی ڕەوای هەر نەتەوەیەک، جێگەی مشتومڕی ئەخلاقی نییە، بەڵام لە دنیای سیاسەت و پەیوەندییە نێودەوڵەتییەکاندا بەتەنیا بە دروشم و خواست بەدی نایەت. لە شیکاریی سیاسیدا، هاوسەنگیی هێز و سەروەری و بەرژەوەندیی دەوڵەتان ڕۆڵی یەکلاکەرەوە دەبینن، بۆیە هەر هەنگاوێک بۆ نزیکبوونەوە لەم مافە پێویستی بە خوێندنەوەی وردی واقیع و هەڵسەنگاندنی هاوکێشەی هێز و ئامادەکاریی ناوخۆیی هەیە. سەربەخۆیی تەنیا ساتەوەختی ڕاگەیاندن نییە، بەڵکوو توانای مانەوە و سەقامگیری و خۆبژێوییە لە دوای ڕاگەیاندنەکەوە، لە کاتێکدا گوشارە ئابووری و ئەمنی و دیپلۆماسییەکان دەگەنە بەرزترین ئاست و تەنیا ئەو قەوارە و نەتەوانە بەرگە دەگرن، کە خاوەنی پشتیوانیی ناوخۆیی و ستراتیجی ڕوونن.
لە دۆخی ئێستای ڕۆژهەڵاتی ناوەڕاستدا، گۆڕانکارییەکان بەخێرایی ڕوو دەدەن و هاوکێشەکانی پێشوو لە ژێر پرسیار و گۆڕانکاریدان. ئەم بارودۆخە لە هەمان کاتدا هەم دەرفەت دەهێنێتە ئاراوە و هەم مەترسیی جددیش لەگەڵ خۆیدا دەهێنێت. ئەگەر نەتەوەی کورد خاوەنی گوتارێکی هاوبەشی نەتەوەیی و یەکگرتوویی ناوخۆیی و بڕیاری ڕوون بێت، دەتوانێت وەکوو لایەنێکی کاریگەر مامەڵە بکات و پێگەی خۆی بپارێزێت. بەپێچەوانەوە، ئەگەر ناکۆکیی ناوخۆیی و پەرتەوازەیی درێژەیان هەبێت، ئەو دەرفەتانە بەخێرایی لەدەست دەچن و لایەنەکانی دیکە کەلێنەکان بۆ بەرژەوەندیی خۆیان بەکاردەهێنن، چونکە بۆشایی و دابەشبوونی ناوخۆیی هەمیشە دەرگای دەستێوەردانی دەرەکی دەکاتەوە.
لە کۆتاییدا، بەهێزبوونی دۆزی نەتەوەیی کورد و هەر پێشکەوتنێک بەرەو سەربەخۆیی زیاتر لە هەموو شتێک بەندە بە ناوماڵی کورد خۆیەوە. حوکمڕانیی تەندروست و دامەزراوەی بەهێز و متمانەی نێوان کۆمەڵگە و دەسەڵات و پێشخستنی بەرژەوەندیی نەتەوەیی لەسەر هەموو بەرژەوەندییەکی حیزبی یان کەسی، بناغەی سەرەکیی هەر دەستکەوتێکن. بەبێ یەکڕیزیی نەتەوەیی و بەرپرسیارێتی و تێگەیشتنێکی واقیعبینانە لە دۆخی جیهان و ناوچەکە، هیچ خواستێک ناتوانێت بەئاسانی و بە شێوەیەکی بەردەوام بگاتە ئەنجام.


