دەبوو دوای ڕوخانی ڕژێمی بەعس و هەڵوەشاندنەوەی سوپای عێراق، وسەلەنوێ بونیاتنانەوەی لەدەوڵەتی نوێی عێراقدا، پەندو عیبرەتی لەسوپای نانیشتمانی سەردەمی بەعس وەربگرتایە، چونکە رژێمی بەعس هیچ خەسڵەتێکی نیشتمانی بەسوپاو دام ودەزگا نیشتمانیەکانەوە نەهێشتبوو. سوپاو ئەفسەران و سەربازانی لەبری پاراستنی نیشتمان ببوونە خزمەتکارو پارێزەری سەدام و خزمەکانی و لەهەموو بەهایەکی نیشتمانی داماڵدرابوو، لەبری ئەوەی پارێزەری نیشتمان و هاونیشتمانیان بێت ببووە ماشێنێکی دزێوی وێرانکردن و ڕوخاندنی نیشتمان و بکوژی هاونیشتمانیان.
گەلی کوردستان گەورەترین قوربانی دەستی ئەوسوپایەیە، لەسەر زەوی رەزوباخ و خانوو ماڵی گوندنشینەکانی دەروخاندو گیانی کوردەکانی دەکێشاو لەئاسمانیشەوە هێزی ئاسمانی سوپا ژەهرو بۆمبی بەسەر شاروگوندەکانی کوردستاندا دەباراند. پرۆسەکانی ئەنفال و کیمیابارانی هەڵەبجەو کیمیابارانی گوندەکانی کوردستان بەتایبەتیش ئەوانەی بەهۆی گازەوە کۆمەڵکوژییان تێدابوو لەوانە (بالیسان و شێخ وەسانان، سێوسێنان و گۆپتەپەو عەسکەر و بورجینی) لەهەرسێک پارێزگای سلێمانی و هەولێرو دهۆک پەڵەیەکی ڕەشن بەتەوێڵی سوپای عێراق و شۆڤێنیزمی عەرەبییەوە.
دەبوو نەک ئەمڕۆ هەرلەسەردەمی بەعسەوە پیاوانی باڵادەستی ناوسوپا ئارەقی شەرمەزاری بڕێژن و خەجاڵەتی بکێشن کاتێک لەڕاپەڕینی ساڵی ١٩٩١ سەرباری ئەو هەموو تاوانەی لەکوردستان ئەنجامیاندابوو، بەوپەری میهرەبانی و ئەخلاقی بڵندەوە ئەفسەروسەربازانیان لە جەلادەکانی ئەمن و موخابەرات جیاکردەوە، نەک هیچ ئەفسەرو سەربازێکی (چەک وجل)کراویان بەدیلی نەکوشت، بەڵکو سەرباری گەمارۆی ئابوری نێودەوڵەتی و گەمارۆی ئابوری بەعسیەکان لەسەر کوردستان نان وپێخەف وپێداویستییان بۆدابین کردن، خوێنیان بەخشییە ئەوسەربازانەی بریندارببوون.
کەچی هێشتا ئەفسەران و سەربازانی سوپای عێراق دەیانەوێ شوێنپێی بەعسیەکان هەڵگرنەوەو هەمان رەفتاری داگیرکارانە لەگەڵ خەڵکی کوردستان بکەن و سوپای نیشتمانی بگۆڕنەوە بۆسوپای تێکدانی نیشتمان ! نازانم بەچ ڕوییەکەوەو بەکام یاسا سوپا دەچێتە ناوکێشەی پۆلیسەوەو داکۆکی لەکەسانێک دەکات کەموڵک وماڵی یەکێکی داگیرکردبێت ؟ سوپای نیشتمانی چۆن دەبێت لە نیشتمانێکدا لەنێوان هاوڵاتیانی دزو و ماڵدزراودا لەیەنگری دزبێت ؟ ئەم ستەمکارییە بەئاسانی بەسەر کوردەکاندا تێناپەڕێ ئەگەر بەسەرسیاسیەکاندا تێپەڕێ دڵنیابن بەسەر جوتیاران و نەوەی داهاتوودا تێناپەڕێ چۆن دەبێت لەنێوان کوردی خاوەن ماڵ و خاوەن زەوی، سوپا لایەنگری عەرەبی هاوردەی داگیرکاربێت ؟! ئەوەی دوێنێ لە شەرناغە و ناوچەی سەرگەڕان ڕویدا هەم برینی ئەنفال و کیمیاباران دەکولێنێتەوەو هەم نمەک حەرامی و بێ وەفایی و دڵڕەقی وبەدڕەفتاری پیاوانی سوپا.
بێگومان ئەمە بیرهێنانەوەیەکی پێویستەو بەچاودادانەوە نییە، ئەم بیرهێنانەوەیە دەبێت هەڵوەستەتان پێبکات و بزانن لەچ سەردەمێکدا دەژین، ئەمرۆ سەردەمی بەعسیەکان نیە تەنها سەردەمی هامەرو فرۆکەی بێفرۆکەوان و تەکنەلۆژیای جەنگ نییە، سەردەمی کامێراو زیرەکی دەستکردیشە، ئەوەتا هامەرەکانی ئێوە لەبەردەم تراکتۆرێکداو سەربازانی ئێوەو مامەڵەی درندانەی لەگەڵ جوتیارێکی ئازای کورددا لەناو وێنەیەکدا چیرۆکی ئابرومەندی و بێ ئابرویی نیشانی دونیا دەدات .. دڵنیابن کامێراکان لە بیکەیسیەکانتان کاریگەرترن .. تکایە با هەتا ئێرە بەس بێ و ڕێز لەخۆتان و ئەرکی نیشتمانی و ئابروی نیشتمانی خۆتان بگرن. چونکە نیشتمان بەبێ هاوڵاتی رێزلێگیراو دەبێتە دۆزەخێک هەمووانی تێدا دەسوتێین.
ئەگەر ناتانەوێ ئەم رەفتارە دوبارە ببێتەوە، ئەوا یەکەم هەنگاوی پێشەوایەتی هێزەچەکدارەکان و سوپای عێراق ئەوەیە، کە سزای ئەفسەری فەرماندارو ئەو سەربازانەش بدەن، کە پەلاماری جوتیارەکانیانداوە.
