هەموومان لە چەند ڕۆژی ڕابردوودا شایەتی وەڵام و وەڵامکاری هەندێ لەبەرپرسانی یەکێتیی و پارتی بووین، لەسەر خاوەندارێتی و ئێستا و چارەنووس و ئایندەی هەولێر! لایەك هەولێری وەك شارێکی داگیرکراو و دەرهێنراو لەدەستی خاوەنە ڕەسەنەکانی وێنا دەکرد، ئەوی دیکەش وای دەخستەڕوو کە واقیعی لە ئارادابووی ئێستا، گوزارشت لە دۆخی خودخاوەنی شارەکە دەکات، ئەوەی واش بیرناکاتەوە دەتوانێ هەولێرێ لە خەیاڵی خۆیدا بکێشێت و ئایندە و خاوەنی بۆ دەستنیشان بکات.
ئەمەش بەکردەوە ئەوە دەگەیەنێت کە دوای ئەوەی کەرکووك، لە شارێکی ناکۆکی لەسەری نێوان هەرێمی کوردستان و دەوڵەتی عێراق-ەوە گۆڕا بۆ شارێکی ناکۆکی لەسەری نێوان یەکێتیی و پارتی، ئەمەش بەحوکمی ئەوەی شتێکمان بەناوی بڕیار و ستراتیجی هاوبەشی نیشتیمانی نەبووە و نییە، تا بەهەناسە و دید و ئیرادەیەکی تۆکمە و هاوبەشەوە بەرامبەر بەغدا خۆمان وەك ناسیۆنالیزم و گەل پێناسە بکەین و پێداگری لەسەر مافەکانمان بکەین و خاوەندارێتی نیشتیمانیانەی هاوبەش لە شارەکە و کۆی ناوچە کوردستانییەکانی دەرەوەی هەرێم بکەین. هەر ئەوەش لە کەناری لەدەستدانی کۆتایی نزیکی کردۆتەوە. هەولێر-یش بەجۆرێکی تر خەریکە بەهەمان دەرد بچێت!
هەولێر، ڕۆژ بە ڕۆژ لە پایتەختی کۆکەرەوەی جیاوازیی و فرەییەکان و سەنتەری دروستکردنی بڕیاری نیشتیمانی و ڕەمزی هاوبەشەوە، بەهەمان شێوەی کەرکووك وا خەریکە ببێت بە شارێکی ئاسایی و پانتاییەکی جوگرافی و دانیشتوانیی کێشەلەسەر و جێناکۆکی نێوان دوو حیزبەکە! ئەمەش ئەوە دەگەیەنێت کە هێشتا زۆرێ لەکاربەدەستە حیزبییەکان و نوخبەی حوکمڕانی هەرێم پەی بە پێگە، ڕۆڵ، ئاماژە، وەزیفە و ڕەمزییەتی پایتەخت نابەن، یاخوود پەی پێدەبەن و فەرامۆشی دەکەن و لە سۆنگەی ڕق و بەرژەوەندی حیزبیی و تاکەکەسیەوە لەبیر خۆیانی دەبەنەوە!
بەحوکمی ئەوەی عەقڵی سیاسی زاڵ، هاوشێوەی مێژوو و واقیعی بەشێکی بەرچاوی ناوچەکە، غەنیمەت پاڵنەری سەرەکی ئاراستەکردنی بیرکردنەوە و ڕەفتاری سیاسییەتی؟ پێوەری سەرەکیشی بۆ هەڵسەنگاندن و دیاریکردنی گوتار و داڕشتنی بڕیار، هەژموونی حیزبییە بە لۆجیك و میکانیزمەکانی کلتووری زۆنی کۆنتڕۆڵکراو، نەك بەهاو پێوەر و بەرژەوەندییە نیشتیمانیی و دیموکراسییەکان، چونکە ئەگەر ئێمە بەتەواوی مانا لە ئاماژە و ڕۆڵ و ڕەمزییەتی پایتەخت لە دەوڵەتی نوێدا تێبگەیشتانایە، لەوە تێدەگەیشتین، کە هەرگیز ناکرێت هەولێر بە پایتەخت بزانین و بەم زمان و هەناسەوە دەربارەی ئێستا و ئایندەی بدوێین، لەوە حاڵی دەبووین پایتەخت هی هەمووانە و هی کەسیش نییە.
هەولێر سەنتەری بەیەکەوە بەستنەوەی گۆشە و کەنارەکانی وڵاتە بەیەکترەوە، شوێنی نمایشکردنی ئیرادەی نیشتیمانی و پیادەکردنی ناوەڕۆکی نوێنەرایەتی گەل و ڕێکخستنی پەیوەندییە بە دنیاوە. بۆیە ئەگەر دەوڵەت فیدراڵیش بێت، دەبێت پایتەخت هەرێمێکی سەربەخۆ بێت، چونکە ڕۆڵی کۆکەرەوە و هەماهەنگی و ناوبژیوانی و بەیەگکرتوویی هێشتنەوەی وڵات و گەلەکەی دەگێڕێت.
لێرەشەوە پایتەخت پانتاییەك نییە بۆ کۆنترۆڵکردنی حیزبیی، کە بەداخەوە زمانی قسەکردنی هەردوولا (یەکێتیی و پارتی) دەربارەی هەولێر ئەوەی لێ دەخوێنرێتەوە، کە ئەویش درێژەدانە بەهەمان عەقڵییەت و گوتاری شەڕی ناوخۆی نەوەدەکان. لەو سۆنگەوە کە شەڕی ناوخۆ تەنها ڕاگیراوە و کۆتاییی پێنەهاتووە! بەپێچەوانەی دنیاشەوە لە ئەزموونە کوردییەکەدا سیاسەت درێژکراوەی شەڕە.
